डीपीएल : एकै इनिङमा दुई अर्धशतक, अत्तरियाले विराटनगरलाई दियो १४९ रनको चुनौति

काठमाडौँ– धनगढीमा जारी तेस्रो संस्करणको धनगढी प्रिमियर लिग (डीपीएल) क्रिकेटमा सन्नी पटेलले विष्फोटक ब्यटिङ गरेपछि सीवाइसी अत्तरियाले विराटनगर किंग्सलाई १४९ रनको चुनौति दिएको छ । जारी प्रतियागतामा मैदानकमा कारण रन नबनिरहेका बेला अत्तरियाले एकै इनिङमा दुई अर्धशतक हानेको छ ।

फाप्ला मैदानमा टस जितेर ब्याटिङ थालेको अत्तरियाले ओपनर जयकिशन कोल्सावाला र सन्नी पटेलको अर्धशतकको मदतमा निर्धारित २० ओभरमा ३ विकेट गुमाउँदै १४८ रन बनाएको छ । अत्तरियाका लागि प्रतियागिताकै उच्च स्कोर दिलाउने क्रममा सन्नी पटेलले अन्तिममा विष्फोटक ब्याटिङ गर्दा कोल्सावालाले अर्कोतर्फबाट साथ दिए । उनले ५० बलमा २ छक्का र ५ चौकाको मदतमा नटआउट ५१ रन बनाए ।

यता सन्नी पटेलले नटआउट ६१ रनको शानदार पारी खेले । उनले ३१ बलमा ४ छक्का र पाँच चौका प्रहार गरे । सन्नीले अन्तिम १२ बलमा ३९ रन बनाउने क्रममा किशोर महतोको अन्तिम ओभरमा २४ रन प्रहार गरे । यस्तै अत्तरियाका लागि सन्दीप जोराले ३ र कप्तान दीपेन्द्र सिंह ऐरीले १० रन बनाए । दीपेन्द्रले रन आउट हुनुअघि ८ बलमा एक चौका प्रहार गरे ।

यता विराटनगरका लागि शुसन भारी र संसाद शेखले समान १ १ विकेट लिए ।