काठमाडौं । ए डिभिजन लिगमा दुई खेल अगावै च्याम्पियन बनिसकेको मनाङ मर्स्याङदी क्लबले मंगलबार ट्रफी उठाउँदैछ ।
ADVERTISEMENT
फ्रेन्ड्सविरुद्ध हुने मंगलबारको अन्तिम खेलमा उसलाई नतिजाले असर पर्ने छैन । तर पनि जित हासिल गरेको खण्डमा उसले एउटा कीर्तिमान राख्नेछ । त्यो हो, शतप्रतिशत जित । लिगमा शतप्रतिशत जित निकालेर ३६ अंक जोडेको मनाङ अब एक जितबाट टाढा छ ।
ADVERTISEMENT
मनाङका प्रशिक्षक सुमन श्रेष्ठले लिग जितिसकेको अवस्थामा शतप्रतिशत जितको कीर्तिमानका लागि खेल्ने बताएका छन् । जारी लिगमा फ्रेन्ड्सको कमजोर प्रदर्शन भइरहँदा मनाङका लागि कीर्तिमानी यात्रा सहज हुन सक्छ ।
झण्डै पाँच वर्षको अन्तरालमा गएको असोज १३ गतेदेखि सुरु भएको ए डिभिजन लिग ३ महिना १० दिनपछि मंगलबार सकिन लागेको हो । रेलिगेसनको व्यवस्था नभएको तथा पुरस्कार राशी पनि अघिल्लो संस्करणभन्दा घटाइएको यो लिग सुरुआतदेखि विवादित बनेको हो । पाँच वर्षको अन्तरालमा भए पनि एन्फाले लिग सुरु गर्न सकेको छ ।
लिगमा शीर्ष ६ टोलीलाई नगद पुरस्कारको व्यवस्था गरिएको छ । लिगको विजेता मनाङले ५० लाख रुपैयाँ पुरस्कार पाउनेछ । दोस्रो स्थान सुरक्षित गरेको संकटाले ३५ लाख, तेस्रो भएको थ्रीस्टारले २५ लाख, चौथो भएको त्रिभुवन आर्मीले १५ लाख, पाँचौं भएको एपीएफले ७ लाख र छैटौं भएको नेपाल पुलिसले ५ लाख रुपैयाँ पुरस्कार पाउनेछन् ।
त्यस्तै व्यक्तिगततर्फ उत्कृष्ट गोलरक्षक, डिफेन्डर, मिडफिल्डर, स्ट्राइकर र प्रशिक्षकले जनही एक एक थान मोटरसाइकल पुरस्कार पाउनेछन् ।
