गोरखा । गोरखा चुमनुव्री गाउँपालिका–१ सामागाउँको वीरेन्द्र ताल क्षेत्रमा गएरातिदेखि लागेको आगो नियन्त्रणमा आउन सकेको छैन।
आगलागीमा हालसम्म जलेको अवस्था पाँच ओटा दुर्लभ जातका कस्तुरी फेला परेका स्थानियवासी मिङ्गमार लामाले जानकारी दिए।


ADVERTISEMENT


दाउरा संकलनका लागि समेत प्रतिबन्ध लगाइएको उक्त जंगलमा लागेको आगो नियन्त्रणमा लिन नसक्दा नजिकै रहेका अन्य जंगलमा समेत आगो फैलिँदै गएको उनले जानकारी दिए।


ADVERTISEMENT

# # #


आगोले सो क्षेत्रमा रहेका धुपी सल्ला, भोजपत्रलगायतका बहुमूल्य जडीबुटी समेत नष्ट भएका छन्। क्षतिको एकिन विवरण संकलन गर्न सकिएको छैन। अहिले पनि स्थानियवासी र प्रहरी मिलेर आगो निभाउने प्रयास भइरहेको छ। उच्च हिमाली क्षेत्र र तीव्र गतिको हावाका कारण आगो नियन्त्रणमा लिन नसकिएको मनास्लु संरक्षण क्षेत्र आयोजनाका प्रमुख नरेन्द्र लामाले बताए।

उनका अनुसार आगो नियन्त्रणमा लिन अहिले सो क्षेत्रमा अग्नि रेखा बनाउने काम भइरहेको छ वडाध्यक्ष वीर बहादुर लामाले आगो नियन्त्रणका लागी उचित पहल नभएको बताए।

‘अब सामान्य हिसाबले आगो निभाउन सक्ने कुनै संभावना नै छैन’, उनले भने, ‘हेलिकप्टरबाट पानी हाल्न सकेको खण्डमा मात्र आगो नियन्त्रणमा आउन सक्छ।’

प्रमुख जिल्ला अधिकारी गजेन्द्र बहादुर श्रेष्ठले आगो नियन्त्रणका लागि पहल गरी दिन गृहमन्त्रालयलाई आग्रह गरिएको जानकारी दिए। सकेसम्म सेनाको हेलिकप्टर प्रयोग गरेर आगो नियन्त्रणका लागि पहल भइरहेको उनले बताए।

आगो नियन्त्रणमा नआए एउटा गुम्बा जोखिममा पर्नसक्ने बताइएको छ ।

प्रहरी उपरीक्षक भोला रावलले आगो नियन्त्रणका लागि सामागाउँ, लार्के भन्सार र सिर्दीबासबाट प्रहरी परिचालन गरिएको बताए।

ठूलो भिर भएकाले मान्छेले तलबाट आगो निभाउन सक्ने अवस्था नै नभएको बताइएको छ। आगलागीमा सलग्न भएको आरोपमा प्रहरीले एक जनालाई नियन्त्रणमा लिएको छ । रासस