नेकपाको चियापान आज दिउँसो १२ बजेदेखि हुँदै, कार्यक्रममा ५० हजारलाई निम्तो

काठमाडौँ– सत्तारुढ दल नेपाल कम्युनिष्ट पार्टी (नेकपा) ले दसैँ, तिहार, नेपाल सम्वत, छठ पर्वको अवसरमा आज (शनिबार) शुभकामना आदानप्रदान तथा चियापान कार्यक्रम आयोजना गर्दै छ ।

चियापान समारोह भृकुटीमण्डपस्थित पार्कमा आज दिउँसो १२ बजेदेखि सुरु हुनेछ । कार्यक्रम बेलुकासम्मै चल्ने भने यसका लागि करिव ५० हजारलाई निमन्त्रणा गरिएको छ ।

दिउँसो १२ बजेदेखि ३ बजेसम्म पार्टीका नेता, कार्यकर्ता तथा सर्वसाधारणका लागि निम्ता दिइएको छ । दिउँसो ३ देखि बेलुका ५ बजेसम्म विभिन्न राजनीतिक दलका नेता, मन्त्री, सांसद, संवैधानिक निकायका पदाधिकारी, उच्चपदस्थ सरकारी अधिकारी, सुरक्षा निकायका पदाधिकारी, कूटनीतिक नियोगका पदाधिकारीसहितलाई निम्ता गरिएको नेकपाले जनाएको छ ।

पार्टी एकताअघि तत्कालीन एमाले र माओवादी केन्द्रले छुट्टाछुट्टै चियापान गर्दै आएका थिए । एकताको प्रक्रियाले पूर्णता नपाएको र आन्तरिक विवाद बढी रहेका बेला आन्तरिक एकताको अवसरको रुपमा प्रयोग गर्ने नेकपाको तयारी छ ।