सुनकाण्डको अनुसन्धान फितलो भयो : नेता केसी

काठमाडौं– नेपाली काँग्रेसका नेता अर्जुननरसिंह केसीले सुन तस्करीकाण्ड प्रहरीको साथले मात्रै सम्भव नभएको वताएका छन् ।

‘पटक पटक गरि क्विन्टलका क्विन्टल सुन तस्करी हुँदा सरकारी निकायमा प्रहरीलाई मात्रै संलग्नता देखाउनु अनुसन्धान प्रक्रिया फितलो हुनु हो’ –उनले भने । केसीले सुन तस्करीमा थप राजनीतिक व्यक्तिहरु पनि संलग्न हुनसक्ने बताए ।

रातोपाटीसँग कुरा गर्दै केसीले व्यक्ति पक्राउ पर्नु तर सुन फेला पार्न नसक्नु पनि गृह प्रशासनको लाचारीपन भएको बताए ।

‘पारदर्शी तरिकाले अनुसन्धान सरकारले गर्ने हो भने कुन पदमा को कहाँ थिए ? कुन-कुन व्यक्ति हुँदा सुन भित्रिएको थियो । गम्भिर तरिकाले अनुसन्धान हुनुपर्छ ।’ –उनले भने । संलग्न सबैलाई कारवाहि गर्ने आँट सरकारमा हुनुपर्ने उनले बताए । अनुसन्धानको पाटो लामो हुनसक्ने बताउँदै केसीले राजनीतिक दलका नेता संलग्न भएको भेटिएपनि कारवाहि हुनुपर्ने वताए ।

फरक प्रंसगमा नेता केसीले प्रधानन्यायधीश नियुक्ति गर्न नसक्नु सरकारको अकमण्र्यता भएको वताए । स्वतन्त्र न्यायपालिका कायममुकायले ४५ दिनभन्दा बढि न्यायालय चलाउनु सरकारको गैर जिम्मेवारीपन भएको उनको भनाई थियो ।

हनिमुन पिरियड सकिन लागेको सरकारको गतिविधि सन्तोषप्रद नभएको केसीले बताए ।

ओली सरकारले आम जनताका लागि यस अवधिमा उल्लेखनिय काम गर्न नसकेको उनको भनाई थियो । ओली सरकारका गतिविधी शंकास्पद रहेको उनले आरोप लगाए ।

संस्था भन्दा व्यक्ति केन्द्रित भएपछि लोकतन्त्र चल्न नसक्ने उनले वताए । पद्धति,प्रक्रिया र मुल्यलाई वेवास्ता गर्दै प्रधानमन्त्रीले सरकारका अंगहरुलाई आफु केन्द्रित गर्नु सुखद संकेत नभएको उनले बताए ।