“ग्यारेजमा थन्क्याइएका गाडी नचलाए रुट परमिट खारेज गर”–वाइसीएल

काठमाडौं–माओवादीको यूवा संगठन वाइसीएलले यातायात व्यावसायी नै यातायात बन्दमा उत्रिएको घटनाप्रति आफ्नो संगठनको ध्यानाकर्षण भएको जनाएको छ । सो संगठनले ग्यारेजमा थन्क्याइएका गाडीहरु संचालनमा ल्याउन र नमाने तिनका रुट परमिटहरु खारेज गर्न सरकारसँग माग गरेको छ ।

‘तिब्र विकास र सम्बृदिको सपनासहित अघि बढिरहेको मुलुकका लागि कुनैपनि प्रकारको बन्द तथा हड्ताल स्वीकार्य हुनै सक्दैन । यसै सन्दर्भमा यातायात व्यावसायी नै यातायात बन्दमा उत्रिएको आजको घटनाप्रति हाम्रो संगठनको गम्भीर ध्यानाकर्षण भएको छ ।’ संगठनका अध्यक्ष राम प्रसाद सापकोटा ‘दीपशिखा’ र महासचिव सुवोधराज शेर्पालीले जारी गरेको विज्ञप्तीमा छ, ‘यातायात क्षेत्रमा देखिएको सेवा समितिहरुको सिण्डीकेटका विरुद्ध सरकारले चालेको कदमका विरुद्ध आयोजित यातायात बन्दका विरुद्ध सबै किसिमका सवारी संचालन गरेर यात्रामा सहयोग गर्न सवारी चालक तथा धनीहरुलाई हाम्रो संगठन अपिल गर्दछ । साथै आफ्ना सबै निकायहरुलाई पचिालन गरी ग्यारेजमा थन्क्याइएका गाडीहरु संचालनमा ल्याउन र नमाने तिनका रुट परमिटहरु खारेज गर्न समेत सरकारसँग माग गर्दछ । ’

संगठनले संगठनका सम्पूर्ण माताहतका समितिहरुलाई आफुसँग भएका सवारी साधनहरु (निजी मोटरसाईकल/कार, ढुवानीमा प्रयोग हुने साधनहरु) परिचालित गरि सार्वजनिक सेवा दिन समेत निर्देशन दिएको छ । आफुअनुकुल स्थानमा ‘लिफ्ट’ दिई सहयोग पुर्याउनुहुन आम निजी सवारी धनिहरुलाई समेत अपिल गरेको छ ।