काठमाडौँ– सरोकारवालाले रानीपोखरी पुनःनिर्माण पनि पुरानै शैलीमा गरिनुपर्नेमा जोड दिएका छन् ।
ADVERTISEMENT
रानीपोखरी भित्रको मन्दिर निर्माणका क्रममा विवाद उत्पन्न भएपछि समाधान गर्न यही पुस १३ गते पुरातत्व विभागका पूर्वमहानिर्देशक विष्णुराज कार्कीको संयोजकत्वमा ११ सदस्यीय विज्ञ समूह निर्माण गठन गरिएको थियो ।
ADVERTISEMENT
उक्त समूहले गत मंगलबारबाट पुनःनिर्माणका सम्बन्धमा सर्वसाधारणको धारणा लिन सुझाव आह्वान गरेको थियो । समयसीमाभित्रै रहेर प्रायः सबै सर्वसाधारणले पुरानै शैलीमा रानीपोखरीको पुनःनिर्माण गर्न सुझाव दिएका कामपाका प्रशासकीय अधिकृत धनीराम शर्माले राससलाई जानकारी दिए ।
ऐतिहासिक महत्व बोकेको रानीपोखरी पुनःनिर्माण पनि पुरानै शैलीमा हुनुपर्ने उनीहरुको जोडदार माग रहेको विज्ञ समूहको संयोजकसमेत रहनुभएका शर्माले बताए ।
सर्वसाधारणले विज्ञ समूहको सचिवालय राष्ट्रियसभा गृह, इमेल र फोनमार्फत आ–आफ्ना सुझावका दिएका थिए । देशविदेशका धेरै पवित्र नदीका जल प्रयोग गरिएको ‘विष्णुतीर्थ’ को नामले परिचित सो पोखरीको मन्दिर पुनःनिर्माणका क्रममा कङ्क्रिट प्रयोग भएपछि विवाद उत्पन्न भएको थियो ।
सुझावका आधारमा पोखरीको उत्खनन पनि गरिनेछ । प्रताप मल्लकालीन शैलीमै रानीपोखरी पनि पुनःनिर्माण गरिने निर्णय पनि भइसकेको छ । विसं २०७२ को भूकम्पले करिब ४०० वर्ष पुरानो रानीपोखरी र बालगोपालेश्वर मन्दिर पूर्णरूपमा क्षतिग्रस्त भएको थियो ।
यता विज्ञ समूहले पनि आजदेखि प्रतिवेदन तयार पार्न शुरु गरेको छ । पुस १३ गते बसेको महानगरपालिकाको बैठकले १५ दिन भित्र प्रतिवेदन तयार पार्न सो समूमहलाई निर्देशन दिएको थियो । समूहले पुस २७ गते प्रतिवेदन पेश गर्नुपर्नेछ ।
