प्युठान कांग्रेस अधिवेशन : मतगणना स्थलमा प्रहरीले गोली चलाएपछि…

दाङ – नेपाली कांग्रेसको १४ औँ महाधिवेशन अन्तर्गत प्यूठानमा मतगणनाको क्रममा मंगलबार बेलुकी भएको झडप नियन्त्रणमा लिन प्रहरीले चलाएको गोली लागेर प्रहरीसहित ७ जना घाइते भएका छन्।

गोली लागेर गम्भीर घाइते भएकाहरुलाई थप उपचारको लागि बुटवल लगिएको छ। प्रमुख जिल्ला अधिकारी खिमराज भुसालले गोली नचलेको भन्दै प्रहरीको बचाउ गरेका थिए।

घटनास्थलमा रहेका प्रत्यक्षदर्शीका अनुसार प्रहरीले ४ राउन्ड गोली चलाएको थियो । प्रहरीले आफैँ चलाएको गोली खुट्टामा लाग्दा प्रहरी जवान घाइते भएका छन्।

उनीसहित तरुणदल प्युठानका उपाध्यक्ष रोयल कृष्ण र बिजय रिजाललाई बुटवल रिफर गरिएको छ । अन्य घाइते कुबेर घर्ती, कमल घर्ती, खेमराज पण्डित लगायतको प्युठान जिल्ला अस्पतालमा उपचार भइरहेको छ ।