नेपाली नम्बरप्लेटका बुलेटमा ग्यास आयात गर्ने विषयमा भारतीय ढुवानीकर्तासँग स्वदेशी उद्योगीले छलफल गर्ने भएका छन् । सो विषयमा छलफल गर्न भारतीय ग्यास ढुवानीकर्ता अर्को साता काठमाडौँ आउन लागेको ग्यास उद्योग संघका अध्यक्ष गोकुल भण्डारीले बताए । ‘ग्यास आयात सम्बन्धमा छलफल गर्न भारतीय ढुवानीकर्ता एक सातामा काठमाडौं आउँदै छन्,’ उनले भने, ‘उनीहरूसँग छलफल गरेर नेपाली नम्बर प्लेटका बुलेट सञ्चालनका विषयमा ठोस धारणा बनाउँछौँ ।’
व्यवसायीले आयल निगमबाट ७ सयभन्दा बढी बुलेट सञ्चालन गर्ने अनुमति लिइसकेका छन् र, बुलेट सञ्चालनका लागि आवश्यक प्रक्रिया थालेका छन् । त्यसमा अब भारतले बुलेटमा ग्यास हालेर ढुवानी गर्दा कुनै जोखिम नरहेको भनेर प्रमाणित गरिदिनुपर्ने (एक्स्प्लोसिभ सिर्टिफिकेट) काम मात्रै बाँकी छ । नागपुरमा रहेको एक्स्प्लोसिभ डिपार्टमेन्टले नेपाली नम्बरप्लेटका बुलेटलाई प्रमाणित गरिदिन आनाकानी गरिरहेको छ । भारतीय ढुवानीकर्ताले आफ्ना बुलेट प्रयोगविहीन हुने देखेर नागपुरको एक्स्प्लोसिभ डिपार्टमेन्टलाई प्रलोभनमा पारी नेपाली बुलेटलाई सर्टिफिकेट नदिन चलखेल गरेको स्वदेशी उद्योगीको भनाइ छ ।
‘भारतीय ढुवानीकर्ताकै चलखेलका कारण नेपाली नम्बरप्लेटका बुलेटले एक्स्प्लोसिभ प्रमाणपत्र पाएका छैनन्,’ एक व्यवसायीले भने । यही विषय एक सातापछि हुने छलफलमा उठान गर्ने उद्योगीको भनाइ छ । भारतीय ढुवानीकर्तासँग छलफल गर्नु सकारात्मक हुने आयल निगमको ग्यास विभाग प्रमुख दीपक बरालले बताए ।
‘भारतीय ढुवानीकर्तासँग छलफल गरेर निकास निकाल्ने प्रयत्न सकारात्मक हो,’ उनले भने । भारतीय ढुवानीकर्तासँग उद्योगीले अक्टोबरसम्म मात्रै बुलेट प्रयोगको सम्झौता गरेका थिए । नेपाली नम्बरप्लेटका बुलेटको समस्या समाधान नभएसम्म भारतीय बुलेटमै ग्यास ओसार्ने गरी सम्झौता नवीकरण हुने अध्यक्ष भण्डारीले बताए । ‘बुलेटको समस्याले ग्यास आयातमा कुनै अवरोध हुँदैन,’ उनले भने, ‘ढुवानी सम्झौता नवीकरण गरी भारतीय बुलेटमै केही समय आयात हुन्छ ।’ – नयाँ पत्रिकाबाट