काठमाडौँ– ३ बर्ष अगाडिसम्म अभिनय गरी मोडलिङ क्षेत्रमा स्थापित हुने सपना बुनेर संघर्ष गरिरहेकी थिइन्, मोडल निशा घिमिरे । सोहि सपना चुम्ने अथाह चाहाना र उत्सुकताका साथ उनले एक भोजपुरी चलचित्र, केही नेपाली सिरियल र म्यूजिक भिडियोमा समेत अभिनय गरिसकेकी थिइन् ।
आफ्नो रुचीको विषयमा अझै प्रखर हुने इच्छासंगै अभिनय कोर्स अध्ययनका लागि भारतको देहरादुन जाँदै गर्दा सडक दुर्घटनामा परेर गम्भिर घाइते भएपछि उनको सपना पुरा गर्ने संघर्षमा एकाएक त्यहि पुर्णविराम लाग्यो । त्यसयता उनी करिब ३ वर्षदेखि ओछ्यानमै अर्धचेत अवस्थामा पल्टिराखेकी छन् ।
मोडलिङ क्षेत्रमा स्थापित भएर दुनियाँसामु आफुलाई चिनाउने उनको सपना हाल आफ्नै बलमा एकपटक मात्रै उभिन सके मात्रै भएपनि हुनेमा परिणत भएको छ । यो चाहाना अहिले उनको मात्रै होइन उनको आमाबाबुको पनि सपना नै बनिसकेको छ । यद्यपि उनको अब भने उनको सो स्वास्थ्य अवस्थामा सुधार हुने अपेक्षा राखिएको छ ।
उनको अवस्थाको केहि तस्बिरसहित समाचार सामाजिक सञ्जालमा भाइरल भएपछि उनलाई हाल नर्भिक अस्पतालकी प्रवन्ध निर्देशक मेघा चौधरीले उद्दार गरेकी छिन् । उनकै पहलमा हाल नर्भिकमा मोडल घिमिरेको उपचार प्रकृया पुनः शुरु भएको छ ।
घाइते भए लगतै निशाको उपचार भारतमा भैरहेको थियो । तर, उनको परिवारको आर्थिक अवस्था कमजोर भएका कारण भारतमा उपचार पुर्ण उपचार हुन नसकेपछि उनको परिवारले उनलाई नेपाल ल्याई काठमाडौंको ट्रमा सेन्टरस्थित ३ महिना उपचार गराएको थियो । यद्यपि त्यहाँ पनि उनको अवस्था सुधार हुन नसकेपछि, चिकित्सकको सल्लाहमा उनको विभिन्न थेरापी सेन्टरमा थेरापी पनि चलिरहेको थियो ।
उपचारकै क्रममा भएको पैसा पनि सकिनु र अर्कोतिर कोरोना संक्रमण पनि बढ्न थालेपछि उनलाई परिवारले उनलाई घरमै ल्याई राखेका थिए । अर्धचेत अवस्थामा घरमै रहेकी निशाको शरीर सुक्दै गएका कारण उनी झण्डै चिन्नै नसकिने अवस्थामा पुगेकी छिन् ।