२३ सय प्रतिशत नाफा खाएपछि यसरी गरियो दरबार मार्गका चार पसलमा सिलबन्दी

काठमाडौँ– आपूर्तिमन्त्री शिव कुमार मण्डलले नजिकिँदै गरेको दशैंको अवसर पारेर काठमाडौंमा रहेका अन्तर्राष्ट्रिय ब्राण्डेड कपडा तथा जुत्ताको शोरुममा छापा मारेका छन् ।

सरकारले दरवारमार्गका ४ ब्राण्डेड पसलमा सिलबन्दी गरेको छ । नाइक, बेन्टले, स्टोर वान, पुमा, पसलमा सिलबन्दी गरिएको हो ।

आपूर्ति मन्त्रालय र आपूर्ति व्यवस्थापन तथा उपभोक्ता हित संरक्षण विभागले संयुक्त बजार अनुगमन गर्दा ९ सयदेखि २३ सय प्रतिशतसम्म नाफा खाएर बस्तु बिक्री गरेको पाइएपछि सिलबन्दी गरिएको आपूर्तिमन्त्री शिवकुमार मण्डलले जानकारी दिए ।

ती पसलले ‘सेल’को नाममा उपभोक्ता ठगेको देखिएको छ । अनुगमनका क्रममा २ हजार ६ सय रुपैयाँ मूल्यमा खरिद गरिएको नाइक ब्राण्डको जुत्तालाई २६ हजार रुपैयाँसम्म नाफा खाएर बिक्री गरेको पाइएको छ । त्यस्तै, एक सय रुपैयाँ खरिद मूल्य रहेको जुत्तालाई २ हजार ४ सय रुपैयाँसम्म नाफा खाएर बिक्री गरेको पाइएको छ ।

कालोबजारी ऐनमा २० प्रतिशतभन्दा बढी नाफा खान नपाइने व्यवस्था भए पनि व्यापारीहरूले आफूखुसी मूल्य कायम गरी उपभोक्ता ठगेका हुन् । ती पसलले आवश्यक बिलविजक प्रस्तुत गर्न नसकेपछि अनुगमन टोलीले शिल गरेको हो । आपूर्ति मन्त्री मण्डलले उपभोक्ता ठग्ने व्यापारीलाई कठोर कारवाही गर्ने बताए ।

अनुगमनका क्रममा मन्त्री मण्डलले उपभोक्ता ठगी गर्नेलाई नछोड्ने बताए । मन्त्री मण्डलले ती शिलबन्दी गरिएका शोरुमको थप अध्ययन गरी कारबाहीको प्रक्रिया अघि बढाउन विभागलाई निर्देशन दिएका छन् ।

अनुगमन टोलीले राजधानीका ७ मुख्य व्यापारिक केन्द्रहरुमा छापा मारेको थियो ।