परराष्ट्रमन्त्रीलाई विद्यार्थी संगठन ज्ञापनपत्र : नेपाली भूमि फिर्ता गर्न कुटनीतिक पहल थाल्नुहोस्

काठमाडौँ – नेपाल विद्यार्थी संघसहित सात विद्यार्थी संगठनले नेपालको भूभाग मिचेर भारतले सडक निर्माण गरेको सम्बन्धमा परराष्ट्रमन्त्री प्रदीपकुमार ज्ञवालीलाई ज्ञापनपत्र बुझाएका छन् ।

नेविसङ्घको नेतृत्वमा प्रतिपक्षी दलहरु निकटका सात विद्यार्थी संगठनका पदाधिकारीले आज संयुक्त रुपमा सो ज्ञापन पत्र बुझाउँदै मिचिएको नेपाली भूमि फिर्ता गर्न र नेपालको सार्वभौमसत्तालाई सम्मानका लागि गम्भीर भई तदारुकता देखाउन सरकारसँग माग गरेका छन् ।

विद्यार्थी संगठनका पदाधिकारीहरुले सो प्रकरणकाविरुद्ध सम्पूर्ण जनतालाई एकजुट बनाई अघि बढ्न तत्काल सर्वदलीय, सर्वपक्षीय बैठक राखी भारतसँग उच्च कूटनीतिक पहल गरी नेपाली भूमि फिर्ता गर्न माग गरेको नेविसंघका महामन्त्री बलदेव तिमल्सिनाले जानकारी दिए ।

भारतले नेपाली भूभाग लिपुलेक हुँदै चीनको मानसरोवरसम्म पुग्ने बाटो निर्माण गरेको घट्नाले स्तब्ध भएको नेविसङ्घ, अखिल (क्रन्तिकारी), अखिल (पाँचौँ), अखिल (क्रान्तिकारी), राप्रविसं, अखिल नेपाल विद्यार्थी युनियन र राप्रविसङ्घ (संयुक्त) द्वारा संयुक्त रुपमा जारी विज्ञप्तिमा उल्लेख छ । भारतले छ महिनापहिले उक्त नेपाली भूभाग आफ्नो नक्सामा राखी प्रकाशित गर्नु र अहिले पुनः उक्त नेपाली भूभागमै भारतीय राजमार्ग निर्माण गर्नु अत्यन्तै खेदजनक भएको विद्यार्थी सङ्गठनहरुले उल्लेख गरेका छन् ।