बाग्लुङ – नेपालकी छैटौँ कोरोना सङ्क्रमित महिलालाई कोरोना निको भएको छ । बागलुङ नगरपालिका–३ गौडाकोटकी ६५ वर्षीया कोरोना सङ्क्रमित महिलाको तेस्रो र चौथो पटकको रिपोर्ट नेगेटिभ देखिएको हो ।
ADVERTISEMENT
दोस्रो रिपोर्ट पनि नेगेटिभ आएपछि आएपछि धौलागिरि अञ्चल अस्पताल बागलुङमा १७ दिनदेखि उपचाररत उनको डिचार्ज गर्ने तयारी भइरहेको धौलागिरि अञ्चल अस्पतालका मेडिकल सुपरिटेन्डेन्ट डा शैलेन्द्र वि पोखरेलले जानकारी दिए ।
ADVERTISEMENT
“हामी बैठकमा छौँ”, पोखरेलले भने, “सकेसम्म आजै नत्र भोलि घर पठाउने अस्पतालको तयारी छ ।” गत चैत ४ गते बेल्जियमबाट कतार हुँदै बागलुङ आएकी उनलाई चैत १७ गते कोरोना सङ्क्रमण भएको पुष्टि भएपछि धौलागिरि अञ्चल अस्पतालको आइसोलेशनमा भर्ना गरी उपचार भइरहेको थियो ।
कोरोना सङ्क्रमण भएको पुष्टि भएपछि धौलागिरि अञ्चल अस्पतालको आइसोलेशन वार्डमा उपचाररत महिलाको यसभन्दा पहिले दुई पटक स्वाब परीक्षण गर्दा पोजेटिभ आए पनि तेस्रो र चौथौ पटक नेगेटिभ आएका कारण उनलाई कोरोना ठीक भएको गण्डकी प्रदेश स्वास्थ्य कार्यालयका प्रमुख सुरज गुरौँले जानकारी दिए।
“चौथो रिपोर्ट पनि नेगेटिभ आएको छ”, गुरौँले भने, “दुई पटकसम्म नेगेटिभ रिपोर्ट आउनु भनेको कोरोना निको हुनु हो ।” अस्पतालबाट डिस्चार्ज भएकी महिलालाई अझै केही समय घरकै क्वारेन्टाइनमा बस्नुपर्ने डाक्टरहरुले बताएका छन् ।
यससँगै नेपालमा कोरोना संक्रमणपछि निको हुनेको संख्या तीन पुगेको छ । यउसअघि आजै काठमाडौँमा उपचाररत १९ वर्षीय युवती (दोस्रो संक्रमित) निको भएर घर फर्किएकी थिइन् । पहिलो व्यक्ति भने चीनबाट आएका एक विद्यार्थी थिए । गत माघ पहिलो साता कोरोना देखिएका उनी केही दिनको उपचारपछि निको भएका थिए ।
नेपालका अब कोरोना संक्रमित २७ जना उपचाररत रहेका छन् । शुक्रबारमात्रै उदयपुरमा १२ जना र चितवनमा दुई जनामा कोरोना भाइरस पुष्टि भएको थियो ।
रासस
