संविधान संशोधनका विपक्षमा मतदान गर्ने राप्रपाको निर्णय

काठमाडौँ– राष्ट्रिय प्रजातन्त्र पार्टी (राप्रपा)ले संविधान संशोधन विधेयकको विपक्षमा मतदान गर्ने निर्णय गरेको छ ।

हेटौडामा आज सम्पन्न पार्टी केन्द्रीय समितिको विशेष बैठकले संशोधनको विपक्षमा मतदान गर्ने निर्णय गरेको सह–प्रवक्ता मोहन श्रेष्ठले जानकारी दिए ।

संसदमा हाल विचाराधीन संविधान संशोधन विधेयकले मधेस र मधेसी जनताको मूलभूत हक, हित र समस्यालाई सम्बोधन गर्न नसकेको, मधेस केन्द्रीत राजनीतिक दलहरुले विधेयक पारित नभएपनि चुनावमा भाग लिने प्रतिबछता जनाएको, विधेयक पारित गराउने बारे स्वयम् सत्तारुढ दल, सरकार र राजपासमेत गम्भीर नरहेको, राप्रपाको तर्फबाट संसदमा पेश भएको हिन्दुराष्ट्र पुर्नस्थापनासम्बन्धी संविधान संशोधन विधेयक छलफलमा नल्याइएको तथा राप्रपालाई विभाजन गर्ने कार्यमा सरकार र सत्तारुढ दलहरु नै सक्रियाशिल रहेकाले विधेयकको विपक्षमा मतदान गर्ने निर्णय गरिएको श्रेष्ठले बताए ।

बैठकले प्रचण्ड नेतृत्वको सरकारमा सहभागि हुनुलाई गम्भीर भुल भएको ठहर गर्दै आत्मसमर्पणवादी मानसिकताबाट ग्रस्त रहेको सरकारमा सहभागि हुनु राप्रपाजस्तो पार्टीलाई प्रत्युपादक हुन पुगेको निष्कर्ष निकालेको छ ।

यस्तै बैठकले देशको वर्तमान राजनीतिक परिस्थतिको समीक्षा गर्दै राष्ट्रियता, प्रजातन्त्र र समग्र अर्थतन्त्रमा देखा परेको ह्रास र नकारात्मक प्रबृत्तिप्रति चिन्ता समेत गरेको छ । सत्तारुढ दलको गलत नीति र सत्ता लिप्साका कारण तराईमा सानै र सुक्ष्म रुपमा भएपनि विखण्डनकारी तत्व क्रियाशिल भैरहेको भन्दै यसबारे गम्भीर हुन सरकारसँग बैठकले आग्रह गरेको छ ।

बैठकले आगामी भदौ १५ गतेदेखि देशभर पार्टीका स्थानीय तहका अध्यक्षहरुको सम्मेलन गर्ने सनातन धर्म सभाको आयोजना गर्नेलगायतका कार्यक्रम पनि तय गरेको छ ।

वरिष्ठ नेता पशुपति शमशेर राणाले आफ्नो पक्षमा ४० प्रतिशत केन्द्रीय सदस्य तथा सांसद रहेको दाबी गर्दै पार्टी विभाजनको प्रयास थालेपछि तीन दिनयता राप्रपाको हेटौडामा केन्द्रीय समितिको विशेष बैठक बसेको हो । बैठकले राणा पक्षमा लागेकाहरु मुल पार्टीमा फर्किए यसअघि घोषणा गरिएको कारबाही फिर्ता लिने निर्णय समेत गरिसकेको छ ।